اسلام آباد یونائیٹڈ کی ٹیم حیدر آباد کنگز مین کو شکست دیکر پلے آف مرحلے میں پہنچنے والی تیسری ٹیم بن گئی۔
لاہور قلندرز، کراچی کنگز، حیدرآباد کنگزمین اور کوئٹہ گلیڈی ایٹرز پلے آف کی دوڑ میں شامل ہیں۔
حیدرآباد کنگزمین کے خلاف جیت کے سبب اسلام آباد یونائیٹڈ نے 11 پوائنٹس کے ساتھ نہ صرف ٹاپ فور میں جگہ پکی کرلی بلکہ پلے آف کےلیے بھی کوالیفائی کرلیا۔
میچ میں صرف 80 رنز پر آؤٹ ہونے اور شکست کے سبب حیدرآباد کنگزمین کا رن ریٹ بھی کم ہوگیا اور و ہ پانچویں نمبر پر چلی گئی جبکہ لاہور قلندرز کو ٹیبل پر چوتھے نمبر پر قدم جمانے کا موقع مل گیا ہے۔
اس وقت ٹیبل پر صورتحال بڑی دلچسپ ہوگئی ہے، لاہور قلندرز، حیدرآباد کنگزمین اور کراچی کنگز کے 8، 8 پوائنٹس ہیں اور یہ تینوں ٹیمیں پلے آف کی آخری ٹیم کے طور پر مضبوط اُمیدوار ہیں۔
اب آخری میچوں میں بات ان ٹیموں کی جیت کی نہیں رہی بلکہ ان کو فتح کے ساتھ ساتھ اپنا نیٹ رن ریٹ بھی بہتر کرنا ہوگا۔
یہ کہہ سکتے ہیں حیدرآباد کنگزمین کو لاہور قلندرز اور کراچی کنگز پر کچھ ایڈوانٹیج حاصل ہے کیونکہ حیدرآباد کنگزمین کا آخری مقابلہ کراچی اور لاہور کے میچوں کےبعد ہوگا۔
دوسری جانب اسلام آباد یونائیٹڈ کی ٹیم کی حیدرآباد کنگزمین کے خلاف فتح سے کوئٹہ گلیڈی ایٹرز کے لیے بھی ٹاپ فور میں پہنچنے کی کچھ اُمیدیں پیدا ہوگئی ہیں۔
اس وقت کوئٹہ گلیڈی ایٹرز کے 6 پوائنٹس ہیں اور اُس کا آخری میچ آج کراچی کنگز کے خلاف ہے۔
اگر کوئٹہ گلیڈی ایٹرز کی ٹیم کراچی کنگز کو، پشاور زلمی، لاہور قلندرز کو اور راولپنڈیز کی ٹیم حیدرآباد کنگزمین کو شکست دینے میں کامیاب ہوتی ہے تو 4 ٹیموں کے 8، 8 پوائنٹس ہوجائیں گے تو اُس صورت میں فیصلہ بہتر رن ریٹ کی بُنیاد پر ہوگا۔
