انگلینڈ کے فاسٹ بولر کرس ووکس نے ٹوٹے ہاتھ کے ساتھ بیٹنگ کر کے پاکستان کے سابق کپتان سلیم ملک کی یاد تازہ کر دی۔
1986ء میں فیصل آباد میں ویسٹ انڈیز اور پاکستان کے درمیان ٹیسٹ میچ کھیلا جا رہا تھا، پہلی اننگز کے دوران ویسٹ ایڈیز کے فاسٹ بولر میلکم مارشل کی گیند سلیم ملک کے ہاتھ پر لگی تھی جس کے بعد وہ زخمی ہو کر پویلین لوٹ گئے تھے۔
سلیم ملک نے وسیم اکرم کے ساتھ آخری وکٹ پر 32 رنز کا اضافہ کیا، انہوں نے زخمی ہاتھ سے 14 گیندوں کا سامنا کرتے ہوئے 3 رنز بنائے، انہوں نے لگ بھگ 41 منٹ کریز پر گزارے۔
اس ٹیسٹ میچ میں پاکستان نے ویسٹ ایڈیز کو 186 رنز سے شکست دی تھی۔
واضح رہے کہ گزشتہ روز بھارت کے خلاف انگلینڈ کے فاسٹ بولر کرس ووکس بھی ایسے وقت میں ٹوٹے ہاتھ سے بیٹنگ کرنے آئے تھے جب انکی ٹیم کو جیت کے لیے 17 رنز درکار تھے۔
میچ کے دوران انجرڈ ہوجانے والے کرس ووکس زخمی ہاتھ کے ساتھ بیٹنگ کے لیے آئے، دوسرے اینڈ سے گس ایٹکنسن نے مزاحمت جاری رکھی لیکن وہ 6 رنز قبل ہمت ہار گئے۔ انہیں محمد سراج نے آؤٹ کیا۔ البتہ کرس ووکس نے بیٹنگ کے دوران کسی بھی گیند کا سامنا نہیں کیا تھا۔
اس طرح انگلینڈ کی پوری ٹیم 367 رنز بناکر آؤٹ ہوگئی اور میچ بھارت نے 6 رنز سے جیت گیا۔
